Të paktën dy persona kanë humbur jetën dhe 31 të tjerë kanë mbetur të lënduar si pasojë e një aksidenti mes një autobusi me targa boshnjake dhe një automjeti në Kroaci, përkatësisht në autostradën A3 mes Popovaçës dhe Krizhit, raportoi të dielën mediumi kroat “Index.hr”.
Të lënduarit janë dërguar në spital për trajtim mjekësor, teksa një hetim në vendngjarje nga Prokurori i Shtetit në Sisak ka nisur për të përcaktuar të gjitha rrethanat e këtij aksidenti.
Ministrja kroate e Shëndetësisë, Irena Hrstiq, teksa ka shprehur ngushëllime për familjet e të vdekurve, ka thënë se në mesin e të lënduarve ka edhe fëmijë.
Ajo ka thënë se asnjë prej të lënduarve nuk është në gjendje kritike, ndonëse kanë marrë lëndime të rënda.
“Sipas informacioneve fillestare, rreth një e treta e të lënduarve kanë lëndime të rënda fizike, kryesisht të natyrës së kockave dhe kyçeve. Midis të lënduarve ka të mitur, dhe mosha mesatare e pasagjerëve është e moshës së mesme. Shumica e viktimave ishin shtetas të Bosnjë-Hercegovinës. Dhjetë ekipe mjekësore emergjente nga disa qarqe u dërguan në terren dhe të lënduarve do t’u ofrohet ndihmë psikologjike, përveç kujdesit mjekësor, nëse është e nevojshme”, ka thënë ajo.
Komandanti i Departamentit të Zjarrfikësve të Qarkut Sisak-Moslavina, Miroslav Golub, ka thënë se shkaku i aksidentit të rëndë ishte një dre që doli me vrap në autostradë.
