Të paktën 100 burra që po punonin ilegalisht në një minierë ari të braktisur në Afrikën e Jugut, kanë vdekur pasi ishin bllokuar thellë nën tokë për muaj të tërë, ndërsa policia u përpoq t’i detyronte ata të largoheshin, tha një grup që përfaqësonte minatorët.
Më shumë se 500 të tjerë janë ende të bllokuar, tha grupi të hënën, shkruajnë mediat e huaja, përcjell Telegrafi.
Sabelo Mnguni, një zëdhënës i Grupit të Bashkuar në Veprim të Komuniteteve të Ndikuara nga Minierat, tha për Associated Press se një celular i dërguar në sipërfaqe me disa minatorë të shpëtuar të premten kishte dy video në të që tregonin dhjetëra trupa nën tokë të mbështjellë me qese plastike
Mnguni theksoi se “një minimum” prej 100 burrash kishin vdekur në minierën në provincën Veri-Perëndimore, ku policia nisi fillimisht një operacion në nëntor për të detyruar minatorët të largoheshin.
Ata dyshohej se kishin vdekur nga uria ose kishin vdekur nga dehidratimi, tha Mnguni. Ai tha se 18 trupa janë nxjerrë që nga e premtja.
Nëntë prej këtyre trupave u gjetën në një operacion të udhëhequr nga komuniteti të premten, shtoi ai.
Nëntë të tjerë u gjetën në një operacion zyrtar shpëtimi nga autoritetet të hënën, kur u nxorën edhe 26 të mbijetuar, theksoi më tej Mnguni.
Zëdhënësi i policisë, brigadieri Sebata Mokgwabone tha se ata ende po verifikonin informacionin se sa trupa ishin gjetur dhe sa të mbijetuar ishin nxjerrë pas fillimit të një operacioni të ri shpëtimi të hënën.
