Stuhia tropikale Maria ka zbarkuar në rajonin verior të Japonisë, Iwate, duke e goditur vendin me shi të rrëmbyeshëm i cili ka ndërprerë fluturimet dhe shërbimet hekurudhore, ndërsa ka detyruar njerëzit në disa zona të evakuoheshin.
Deri më tash, nuk ka raportime për viktima.
Bëhet e ditur se stuhia me shpejtësi maksimale të erës prej 72 km/h pritet të lëvizë drejt Detit të Japonisë, shkruan Reuters, përcjell Telegrafi.
“Qeveria do të bëjë më të mirën për të trajtuar situatën”, tha kryeministri japonez, Fumio Kishida.
“Ne do të vazhdojmë të ofrojmë informacion për banorët dhe të mbështesim ata që evakuohen”, shtoi ai.
Ndryshe, trenat dhe shërbimet e rregullta janë pezulluar në Iwate dhe zona të tjera veriore, ndërsa Japan Airlines dhe All Nippon Airways gjithashtu kanë anuluar fluturimet nga rajonet e prekura.
