Aktori i njohur i Hollywoodit, Jim Carrey, ka treguar hapur arsyen se përse është rikthyer në filmin e njohur “Sonic The Hedgehog 3”, duke thënë se i janë dashur paratë.
Veterani i aktrimit, i cili nuk ka bërë shumë role nëpër filma përgjatë dekadës së fundit, i ka thënë agjencisë së lajmeve Associated Press, se gjëja e parë që e tërhoqi ta luajë këtë film është se do ta luante rolin e një gjeniu.
“Jam rikthyer në këtë univers sepse, së pari luan rolin e një gjeniu, gjë që më ka tërhequr. Dhe së dyti, sepse kam blerë shumë gjëra e më duheshin paratë, sinqerisht”, ka thënë Carrey duke qeshur.
Pas një karriere të bujshme në vitet 80’, 90’ e fillim të 2000-ve ylli i filmit “Ace Ventura”, kohët e fundit ka qenë mjaft selektiv sa i përket roleve në projekte filmike.
Në vitin 2022, përgjatë promovimit të filmit “Sonic the Hedgehog 2”, ai i pati thënë mediumit Access Hollywood, se po planifikon të pensionohet nga aktrimi.
“Jam shumë serioz. Varet, nëse më vjen ndonjë skenar që është i shkruar me ari, e i cili më bën të mendoj se do të jetë shumë i rëndësishëm që njerëzit ta shohin, mund të vazhdoj të punoj. Por po pushoj pak”, pati thënë ai.
Kurse në vitin 2018, Carrey, për Hollywood Reporter pati thënë se nuk po dëshiron të jetë më pjesë e këtij biznesi.
“Thjesht nuk dua të jem më në këtë biznes. Nuk më pëlqente se çfarë po ndodhte nëpër korporata. Ndoshta edhe sepse po më hiqej kreativiteti im në njëfarë mënyre”, pati thënë ylli.
Në filmin “Sonic the HedgeHog 3”, Carrey luan rolin e Gerald Robotnik, si dhe atë të Dr. Robotnik. Të tjerë aktorë që kanë huazuar zërin për këtë projekt filmik janë, Keanu Reeves, Idris Elba, James Marsden, Ben Schwartz, Tika Sumpter, Natasha Rothwell, Shemar Moore, Adam Pally dhe Krysten Ritter.
