Rihapja madhështore e kësaj fundjave të katedrales Notre Dame i dha një moment të rrallë pushimi presidentit Emmanuel Macron, pasi Franca mbetet e përfshirë në një krizë institucionale.
Megjithëse ceremonia mahniti liderët botërorë, përfshirë presidentin e sapozgjedhur të SHBA-së, Donald Trump, Macron mbetet shumë i papëlqyer në vend.
Bëhet e ditur se rihapja e shumëpritur e monumentit 860-vjeçar të shkatërruar nga zjarri u la në hije nga një votë mosbesimi në parlament që rezultoi në rënien e qeverisë së kryeministrit Michel Barnier të mërkurën.
Një turne diplomatik
Presidenti francez shënoi një triumf të madh diplomatik duke tërhequr Donald Trump për udhëtimin e tij të parë jashtë vendit që nga fitorja e tij në zgjedhje.
Në Pallatin Elysee, Macron priti Trumpin dhe udhëheqësin ukrainas Volodymyr Zelensky për një takim trepalësh – me shpresën për të bindur presidentin e zgjedhur të SHBA-së që të vazhdojë të ndihmojë Ukrainën në përpjekjet e saj ushtarake kundër agresionit rus.
Por, të premten Trump tha se Ukraina duhet “ndoshta” të presë më pak ndihmë nga SHBA kur të kthehet në pushtet, shkruan euronews, përcjell Telegrafi.
Gjatë një interviste me kanalin televiziv francez BFM, ish-kryeministri francez Dominique de Villepin përgëzoi Macronin për “shfrytëzimin e mundësisë”.
Për më tepër, premtimi i Macron për të rindërtuar Notre Dame në vetëm pesë vjet ishte një bast i rrezikshëm që shumë pak besonin se ai mund ta arrinte.
Kthimi në realitet
Por, tani lideri francez do të rifillojë bisedimet me liderët e partive.
Siç raportohet, ai do të takohet me krerët e Partisë së Gjelbër, Komuniste dhe më pas grupit të pavarur Liot.
Përfaqësuesit e partisë së majtë, France Unbowed (LFI) refuzuan ftesën dhe i kanë bërë thirrje kreut të shtetit të japë dorëheqje.
Udhëheqësi francez justifikoi vendimin për të thirrur zgjedhje të parakohshme duke thënë se kombi kishte nevojë për “sqarim”.
Në vend të kësaj, zgjedhjet legjislative përfunduan në një parlament të bllokuar pa shumicë të qartë.
