Kandidati i opozitës liberale, Lee Jae-myung, është zgjedhur president i ri i Koresë së Jugut. Edhe para se fitorja e Lee të shpallej zyrtarisht, kundërshtari kryesor konservator, Kim Moon-soo, e pranoi humbjen, duke u thënë gazetarëve se “e pranon zgjedhjen e popullit” dhe i uroi fitoren Lee.
Kjo fitore pritet të përfundojë muaj të tërë trazirash politike të shkaktuara nga shpallja e diskutueshme e gjendjes së jashtëzakonshme nga udhëheqësi konservator tashmë i rrëzuar nga pushteti, Yoon Suk Yeol.
Ende nuk është e qartë nëse zgjedhja e Lit do të sjellë ndonjë ndryshim të madh në politikën e jashtme të Koresë së Jugut, raporton bbc.
Lee, i cili më parë është kritikuar si populist që anon nga Kina dhe Koreja e Veriut dhe largohet nga SHBA dhe Japonia, ka theksuar në mënyrë të përsëritur aleancën e Koresë së Jugut me SHBA-në si themel të politikës së saj të jashtme.
Sfidat më të mëdha të jashtme që e presin presidentin e ri janë politika doganore e presidentit amerikan, Donald Trump dhe përparimi i programit bërthamor të Koresë së Veriut.
Lee do të bëjë menjëherë betimin të mërkurën si president, për një mandat të plotë pesëvjeçar, pa periudhën kalimtare dy mujore që zakonisht aplikohet.
