Partia nacionaliste “Ringjallja” u përpoq të pengonte presidenten e Komisionit Evropian, Ursula von der Leyen të hynte në një fabrikë armësh në qytetin Sopot të Bullgarisë të dielën, duke sulmuar një automjet për të cilin të mbledhurit besonin se ndodhej ajo.
Kreu i “Ringjalljes”, Kostadin Kostadinov, i cili më parë ka bërë thirrje për tërheqjen e Bullgarisë nga NATO, organizoi demonstrata me një parti tjetër nacionaliste, “Velichie”, në Fabrikat e Inxhinierisë së Makinerive Vazov në Sopot në kundërshtim me rrugën evropiane të Bullgarisë dhe kërkoi mbrojtje të sovranitetit kombëtar.
Kostadinov u filmua duke bllokuar një automjet të zi, teksa policia bullgare po përpiqej t’i bënte demonstruesit të lejonin makinën të kalonte, përcjell Telegrafi.
Në një video në mediat sociale, demonstruesit që mbanin flamuj bullgarë dhe rusë shihen duke rrethuar makinën, e cila më pas vazhdoi përpara, por u godit disa herë me një nga pankartat.
Kostadinov mund të shihet duke “u përplasur” me policinë me fishkëllima dhe britma “nazistë”, ndërsa automjeti u rrethua më tej nga protestuesit.
Nuk është e qartë nëse presidentja e Komisionit Evropian ndodhej në automjet në kohën e incidentit.
Por Kostadinov më vonë pretendoi se ajo mbërriti në fabrikën e Sopotit me helikopter, jo me makinë.
