Emetimet e CO2 po ngrohin planetin dhe po shkaktojnë ndryshime klimatike. Bota arriti temperaturën më të lartë të regjistruar ndonjëherë të dielën, më 21 korrik, sipas të dhënave paraprake nga Copernicus, programi i vëzhgimit të Tokës të Bashkimit Evropian.
Temperatura mesatare e sipërfaqes atë ditë ishte 17.09 gradë, që është pak më e lartë se rekordi i mëparshëm, i regjistruar në korrik të vitit të kaluar – 17.08 gradë.
NASA harton emetimet e lartpërmendura dhe së fundmi publikoi një vizualizim që tregon se si rrymat e erës dhe ajrit bartnin emetimet e CO2 në atmosferën e Tokës nga janari deri në mars të vitit 2020.
Videoja tregon qartë se nuk ka shumë rëndësi se nga vijnë saktësisht emetimet më të mëdha, të gjithë duhet të përballemi me pasojat në fund. Megjithatë, ka disa dallime interesante globale, shkruan universetoday.
Mbi SHBA, Azinë Jugore dhe Kinën, pjesa më e madhe e karbonit vjen nga industria, termocentralet dhe transporti. Por, mbi Afrikën dhe Amerikën e Jugut, shumica e CO2 vjen nga djegia (përfshirë zjarret në pyje), djegia e produkteve bujqësore dhe pastrimi i tokës. Emetimet vijnë edhe nga lëndët djegëse fosile si nafta dhe qymyri.
Emetimet pulsuese tregojnë zjarre që zakonisht digjen gjatë ditës dhe më pas ulen gjatë natës. Përveç kësaj, pemët dhe bimët kryejnë fotosintezën gjatë ditës, duke çliruar oksigjen dhe thithur CO2. Ka më shumë pulsime në Amerikën e Jugut dhe tropikët, sepse të dhënat u mblodhën gjatë sezonit të rritjes.
Ky vizualizim bazohet në GEOS, një sistem i integruar për modelimin e sistemeve të çiftuara të atmosferës, oqeanit dhe tokës. Në këtë mënyrë, NASA përdor superkompjuterët për të treguar se çfarë po ndodh në atmosferë.
GEOS bazohet në një grup të madh të dhënash; duke përfshirë të dhënat nga satelitët Terra dhe Suomi-NPP. Rezolucioni i GEOS është më shumë se 100 herë më i lartë se modelet tipike të motit.
