Reagimi aspak demokratik i presidentit malazias Milatoviq, me rastin e mosdekretimit të ligjit për Patundshmëritë, ligj i cili godet interesat e shqiptarëve në Tuz e gjithandej, ka shtyrë katër organizatat atdhetare të Malësisë në Amerikë, të shkruajnë letër të hapur.
“Ne nuk heshtim. Jemi të lidhur me faktorë kyç në Kongresin Amerikan, Senat, dhe Departamentin e Shtetit.
Kërkojmë rikthimin dhe miratimin e menjëhershëm të ligjit, si dhe hetim të pavarur për këtë bllokim të rrezikshëm”, thuhet në reagimin e fuqishëm të katër organizatave që mbledhin shqiptarët e Malësisë në Amerikë.
Letra e plotë e hapur nga ShBA:
LETËR E HAPUR nga organizatat shqiptare në SHBA
Malësia e Madhe NY, Malësia e Madhe MI, Malësia Kaliforni dhe Jehona e Malësisë
Drejtuar institucioneve të Malit të Zi, partnerëve ndërkombëtarë dhe opinionit publik:
Vendimi i Presidentit të Malit të Zi për të mos dekretuar Ligjin për Tatimin mbi Patundshmëritë është një akt i pastër anti-shqiptar që godet drejtpërdrejt Komunën e Tuzit dhe komunat me shumicë shqiptare.
Ky është sabotim i qëllimshëm, që pengon zhvillimin ekonomik dhe vetëqeverisjen e shqiptarëve në Mal të Zi. Ndërkohë që toka shqiptare shfrytëzohet nga kompani shtetërore si “Plantaže”, komunave shqiptare u mohohen të ardhurat që u takojnë.
Presidenti Milatoviq, në vend të përgjigjes për këtë padrejtësi, sulmon përfaqësuesin shqiptar Nik Gjeloshaj, duke e paraqitur barazinë si kërcënim.
Ne nuk heshtim.
Jemi të lidhur me faktorë kyç në Kongresin Amerikan, Senat, dhe Departamentin e Shtetit.
Kërkojmë rikthimin dhe miratimin e menjëhershëm të ligjit, si dhe hetim të pavarur për këtë bllokim të rrezikshëm.
Komunat tona nuk janë plaçkë politike.
Janë shtëpia jonë.
Drejtësia do vijë!
