Shkup, 4 maj – Kryeministri Hristijan Mickoski pret që në periudhën e ardhshme mbledhja e të ardhurave të jetë edhe më e lartë. Siç deklaroi ai sot, në të kaluarën ato fonde përfundonin në xhepat e dikujt, por sot ato destinohen për projekte për qytetarët.
Duke iu përgjigjur pyetjes së gazetarëve pas shënimit të 122-vjetorit të vdekjes së Goce Dellçevit, Mickoski iu referua edhe udhëtimit të delegacionit qeveritar në Japoni duke theksuar se shpenzimet janë mbajtur në minimum.
“Mbledhja e të ardhurave është rritur, madje edhe në kushtet e çmimeve më të ulëta të naftës dhe derivateve të naftës. Pres që të ardhurat të rriten edhe më shumë. Në të kaluarën, një pjesë e madhe e atyre mjeteve përfundonin në xhepa privatë, ndërsa sot ato shkojnë në Buxhet dhe përmes projekteve kthehen te qytetarët. Politikë të përgjegjshme dhe të disiplinuar, vetëm ajo mund të na çojë drejt rritjes dhe zhvillimit”, ka thënë kryeministri.
Pas reagimeve të opozitës se ka qenë i shtrenjtë udhëtimi në Japoni, Mickoski theksoi se shpenzimet kanë qenë të paktën tre herë më të ulëta se ato të planifikuara fillimisht nga qeveria e atëhershme e cila tani është në opozitë.
“Udhëtimi në Japoni ka qenë i planifikuar që në kohën kur opozita e sotme ishte qeveri, ajo ka shpallur tenderë dhe ka organizuar udhëtime të tilla. Kjo Qeveri ka bërë që kostot e udhëtimit të atij delegacioni të mbahen në minimum. Kam qenë i ftuar edhe unë së bashku me dy anëtarë të tjerë të kabinetit tim në llogari të qeverisë japoneze, por për shkak të detyrimeve në vend, nuk shkova. Në emrin tim delegacionin e ka udhëhequr Mucunski, ndërsa një pjesë e madhe e njerëzve i kanë mbuluar vetë shpenzimet e tyre, kështu që nga ajo që është planifikuar një vit më parë dhe sa është tani, të paktën tre herë shpenzimet janë më të vogla”, ka thënë kryeministri.
