“Oppenheimer”, një film që ka të bëjë me garën se kush e ndërton bombën e parë atomike, i ka fituar shtatë çmime Oscar, përfshirë çmimin kryesor për filmin më të mirë, gjatë një ceremonie të dielën në Los Anxhelos. Ky film ishte i nominuar për 13 çmime Oscar. Aktori irlandez, Cillian Murphy, e fitoi çmimin për aktorin më të mirë për rolin e tij në këtë film, ku e luajti fizikanin teorik, Robert Oppenheimer, i cili ishte lideri i përpjekjeve amerikane në vitet ’40 për ta krijuar një armë e cila do t’i jepte fund Luftës së Dytë Botërore.
“Jam shumë i kënaqur. Е dini, ju duhet të ecni përpara, por ky ka qenë një moment i madh, i madh për mua. Filmi është kaq i veçantë për mua. Кy është një film që është provokues dhe është sfidues, por megjithatë, ju e dini, kaq shumë njerëzit duan ta shohin atë. Kështu që unë jam vërtet shumë krenar për këtë. Ne e bëmë një film për njeriun i cili e krijoi bombën atomike, dhe ne po jetojmë në botën e Oppenheimerit qoftë për mirë apo për keq. Këtë çmim do të doja t’ua kushtoja paqebërësve kudo”, tha Cillian Murphy, aktor.
Drama historike, që zgjat tri orë, rreth shkencës dhe politikës, “Oppenheimer” u bë hit dhe i fitoi 953.8 milionë dollarë, si dhe mori lëvdata të mëdha nga kritikët. Emma Stone e fitoi çmimin për aktoren më të mirë për rolin që e luajti si një grua e ngjallur nga të vdekurit në komedinë “Poor Things”. Për disa kjo ishte natë historike, pasi Ukraina e fitoi Oscarin e parë për dokumentarin më të mirë: “20 Days in Mariupol”, ndërsa Britania e Madhe e fitoi Oscarin për filmin më të mirë ndërkombëtar: “The Zone of Interest”.
