Senator republikan, Thom Tillis dënoi ashpër veprimet e presidentit amerikan, Donald Trump për të arritur një armëpushim me homologun rus, Vladimir Putin për Ukrainën.
Më herët, Trump e quajti presidentin ukrainas, Volodymyr Zelenskyn “diktator” në rrjetet sociale dhe pretendoi se veprimet e tij “shkaktoi vdekjen e miliona njerëzve pa nevojë”, duke kritikuar ndihmën financiare të SHBA për Ukrainën gjatë mandatit të presidentit Joe Biden.
Tillis, senator republikan, shprehu mbështetjen për liderin amerikan, por theksoi qartë se nuk përkrah asnjë qëndrim që do të justifikonte veprimet e Putinit.
“Jam republikan. Mbështes presidentin Trump dhe besoj se shumica e politikave të tij për sigurinë kombëtare janë të drejta. Por, kushdo që mendon se ka hapësirë për Vladimir Putinin në një botë të qëndrueshme, le të shkojë në Ukrainë dhe të shohë pasojat e veprimeve të tij”, tha Tillis. Ai shtoi se e konsideron Putinin “një kancer dhe kërcënimin më të madh për demokracinë gjatë gjithë jetës së tij”.
Tillis ka qenë një nga mbështetësit më të zëshëm të ndihmës për Ukrainën që nga fillimi i luftës dhe ka kritikuar shpesh Putinin, duke e quajtur “vrasës”. Ai u kthye së fundmi nga një vizitë në Ukrainë, ku ishte dëshmitar i shkatërrimeve të luftës. Gjatë një seance në Senat, ai foli para një fotografie të një varri masiv, duke theksuar brutalitetin e forcave ruse.
“Putini po i lejon trupat e tij të hyjnë në qytete dhe të vrasin civilë, pa dallim. E kam parë me sytë e mi. Shkoni në Bucha dhe shikoni një komunitet të madh sa qyteti juaj i lindjes të shndërrohet në një varrezë masive”, tha ai.
Tillis deklaroi se nuk është i shqetësuar për vazhdimin e ndihmës amerikane për Ukrainën, por theksoi se është përgjegjësi e ligjvënësve të shpjegojnë pse ajo është e domosdoshme. Ai shtoi gjithashtu se nuk ka folur me Trumpin që nga marrja e detyrës, por ka komunikuar me bashkëpunëtorët e tij.
Ndryshe, Senatori dhe Kryetari i Komisionit të Shërbimeve të Armatosura, Roger Wicker, republikan nga Misisipi, bëri një vlerësim të ashpër ndaj presidentit rus, Vladimir Putin, duke deklaruar se diktatori duhet të përballet me ekzekutim dhe jo me negociata.
Deklaratat e Wickerit erdhën pas një takimi midis Sekretarit amerikan të Shtetit, Marco Rubio, dhe zyrtarëve rusë në Arabinë Saudite për të diskutuar luftën në Ukrainë.
