Sekretari i Përgjithshëm i NATO-s, Mark Rutte vlerësoi rolin e rëndësishëm të Turqisë në bisedimet e paqes në Stamboll që synojnë zgjidhjen e konfliktit në Ukrainë, duke thënë se presidenti turk Recep Tayyip Erdoğan është “një udhëheqës i mrekullueshëm brenda NATO-s dhe vërtet i respektuar nga kolegët”, raporton Anadolu.
“Mendoj se ekziston kjo dritare mundësie këtë javë, por edhe në dhjetë ditët, dy javët e ardhshme, për ta çuar vërtet gjithë çështjen e Ukrainës në një vend më të mirë. Nën udhëheqjen, sigurisht, të presidentit (Volodymyr) Zelenskyy, por edhe shumë të drejtuar nga qeveria amerikane. Dhe Turqia luan një rol të madh këtu”, tha Rutte për Anadolu, duke iu referuar bisedimeve të paqes të së enjtes në Stamboll.
Lidhur me shitjen e avionëve “Eurofighter” Turqisë, Rutte tha: “Unë inkurajoj të mos vendosen kufizime në shitjet e armëve nga një aleat te tjetri. Kjo nuk duhet të ndodhë brenda aleancës”.
Ai nënvizoi më tej rëndësinë e industrisë mbrojtëse të Turqisë për NATO-n, duke thënë: “Industria e mbrojtjes e Turqisë është thelbësore për aleancën në tërësi”.
“Për shembull, në Teksas, ka fabrika që prodhojnë municione. Ato nuk do të mund ta kishin bërë këtë pa bashkëpunimin e ngushtë të kompanive këtu në Turqi. Ky është vetëm një nga shumë shembuj”, shtoi ai.
Duke komentuar shpërbërjen e grupit terrorist PKK, Rutte tha: “Ne e dimë që Turqia në përgjithësi është një nga aleatët brenda NATO-s që është goditur më rëndë nga sulmet terroriste”.
