Presidenti amerikan, Donald Trump ka njoftuar një marrëveshje tregtare midis Mbretërisë së Bashkuar dhe SHBA-së.
Sipas Trump, marrëveshja është një “marrëveshje e plotë dhe gjithëpërfshirëse”, shkruajnë mediat britanike.
Ai shkroi në faqen e tij të mediave sociale Truth Social: “Marrëveshja me Mbretërinë e Bashkuar është një marrëveshje e plotë dhe gjithëpërfshirëse që do të çimentojë marrëdhënien midis Shteteve të Bashkuara dhe Mbretërisë së Bashkuar për shumë vite që do të vijnë”.
“Për shkak të historisë sonë të gjatë dhe besnikërisë së përbashkët, është një nder i madh që Mbretëria e Bashkuar është njoftimi ynë i PARË”, ka shkruar më tej Trump.
Sipas tij, “shumë marrëveshje të tjera, të cilat janë në faza serioze negociatash, do të pasojnë!”.
Ndërkohë Downing Street ka thënë se kryeministri britanik Keir Starmer do të bëjë një deklaratë mbi bisedimet tregtare me SHBA-në të enjten.
Sipas mediave britanike, marrëveshja ka të ngjarë të përqendrohet në uljen e tarifave amerikane për produkte specifike, të tilla si çeliku, alumini dhe makinat britanike.
Kujtojmë se Trump tha të mërkurën se po përgatitej të njoftonte “një marrëveshje të madhe tregtare me përfaqësuesit e një vendi të madh dhe shumë të respektuar”.
Në një postim në Truth Social, ai premtoi se do të ishte “e para nga shumë të tjera”.
Nuk është e qartë nëse do të nevojiten bisedime të mëtejshme ose nëse ndonjë ulje e tarifave do të jetë e përkohshme apo e përhershme.
