Ish-presidenti i El Salvadorit, Mauricio Funes, ka vdekur në moshën 65-vjeçare. Lajmin e njoftoi Ministria e Shëndetësisë e Nikaraguas, ku ai jetonte në mërgim. Mauricio Funes, i cili shërbeu si president i El Salvadorit nga 2009 deri në 2014, vdiq për shkak të një sëmundjeje të rëndë kronike.
Funes iku në Nikaragua në vitin 2016 kur u përball me ndjekjen penale në El Salvador, i akuzuar për korrupsion. Atij iu dha shtetësia atje në vitin 2019, gjë që përjashtoi çdo mundësi për ekstradimin e tij. Ai u dënua në mungesë me 28 vite burg në total për bashkëpunim me organizata kriminale, evazion fiskal dhe pastrim parash. Funes kishte mohuar atë që i atribuohej, duke denoncuar “persekutimin politik”.
