Ministri i Mbrojtjes i Ukrainës, Rustem Umerov, tha se Kievi planifikon të propozojë mbajtjen e një takimi midis presidentit ukrainas Volodymyr Zelensky dhe presidentit rus Vladimir Putin, sapo të përfundojnë negociatat mbi çështjet humanitare.
Umerov e tha këtë në një takim me gazetarët, shkruan Kyiv Post.
“Ukraina ka qenë gjithmonë konsistente në përpjekjet e saj për të arritur paqen. Ne e kemi mbështetur iniciativën e SHBA-së për një armëpushim të plotë që nga fillimi dhe kemi vërtetuar angazhimin tonë përmes raundeve të shumta negociatash. Por çdo dialog duhet të zhvillohet pa ultimatume dhe me respekt të plotë për sovranitetin tonë”, tha Umerov.
Bëhet e ditur se negociatat kanë qenë duke u zhvilluar që nga fillimi i vitit.
Përmendja e parë publike e iniciativës së armëpushimit erdhi nga presidenti i SHBA-së, Donald Trump, në janar.
Negociatat janë mbajtur që atëherë në disa faza dhe në disa vende.
Raundi i parë u mbajt në Jeddah, Arabi Saudite, ku përfaqësuesit ukrainas, së bashku me partnerët e tyre amerikanë, përcaktuan parimet e një armëpushimi të mundshëm.
Raundi i dytë u zhvillua në Riad, me bisedime të mëtejshme midis Ukrainës dhe SHBA-së, me pjesëmarrjen e Rusisë nëpërmjet lidhjes video.
Komunikimi midis Kievit dhe Moskës u zhvillua në mënyrë indirekte, përmes ndërmjetësve amerikanë.
Ndërsa në mars, SHBA propozoi zyrtarisht një armëpushim të plotë në tokë, det dhe ajër, me të cilin Ukraina u pajtua.
Megjithatë, pas më shumë se dhjetë orësh bisedimesh, pala ruse refuzoi çdo kompromis.
“Rezultati i vetëm ishte një moratorium i përkohshëm për sulmet ndaj infrastrukturës energjetike”, tha Umerov.
Me kërkesë të Moskës, bisedimet vazhduan më vonë në Turqi, por pa pjesëmarrjen e SHBA-së.
Sipas Umerov, negociatat u përqendruan në tre çështje kryesore: një armëpushim të plotë, masa humanitare si shkëmbimet e të burgosurve, lirimi i civilëve dhe kthimi i fëmijëve, dhe një samit i mundshëm midis udhëheqësve botërorë Zelensky, Putin dhe Trump.
Megjithatë, nuk u arrit asnjë marrëveshje për një armëpushim në dy raundet e fundit, pasi Rusia vazhdon të këmbëngulë në ultimatume që Ukraina i konsideron të papranueshme.
“Ukraina është gati për një paqe të drejtë, jo një pushim të fshehtë për agresion të ri”, theksoi Umerov.
Ndryshe, Umerov tha se Ukraina ka zbatuar një program të strukturuar shkëmbimi të të burgosurve për tre vjet dhe ka qenë konsistente në çështjet humanitare.
Ai paralajmëroi gjithashtu se Rusia mund t’i përdorë këto çështje si një mjet për t’iu shmangur presionit në rritje të sanksioneve.
Si hap tjetër, Ukraina planifikon të propozojë një samit të liderëve botërorë për dialog serioz. Detajet mbi formatin dhe afatin kohor të fazave të reja të negociatave pritet të shpallen së shpejti.
