Një ekip nga inteligjenca ushtarake ukrainase kanë publikuar për herë të parë dronin më të ri detar, që tashmë është dëshmuar si një armë tejet efektive në shkatërrimin e anijeve, helikopterëve dhe aeroplanëve rusë.
Ngjarja është zhvilluar në një lokacion të fshehtë në kryeqytetin e Ukrainës, Kiev, transmeton Telegrafi.
Bëhet fjalë për dronin detar Magura që përdor teknologjinë më të avancuar të armëve, që inteligjencës mbrojtëse ukrainase u ka ndihmuar në kryerjen e operacioneve të shumta në Detin e Zi.
Shefi i inteligjencës ushtarake, gjenerallejtënant Kyrylo Budanov, ishte gjithashtu i pranishëm në prezantim fshehtë.
Shërbimi i inteligjencës ukrainase prezantoi publikisht për herë të parë një seri dronësh Magura duke përfshirë:
Anijen e njohur MAGURA V5, droni kryesor detar i Ukrainës në luftën kundër flotës ruse, i aftë të mbajë deri në 320 kilogramë ngarkesë dhe i pajisur me një modul luftimi që përmban një mitraloz.
Platformën shumëfunksionale MAGURA V6P me një rreze veprimi deri në 540 milje detare.
Dronin Magura V7, i cili mbante raketa, bëri histori duke shkatërruar një aeroplan luftarak armik – ky dron mund të mbajë deri në 650 kilogramë ngarkesë dhe të operojë brenda një rrezeje veprimi deri në 800 milje detare.
Një tjetër model Magura V7, ky i pajisur me një modul luftimi me mitraloz të rëndë.
Dronët Magura kanë luajtur një rol vendimtar në kthimin e valës së luftës detare në favor të Ukrainës.
Operatorët nga Grupi 13, të pranishëm në këtë aktivitet, theksuan se ky është vetëm fillimi për Flotën e Detit të Zi të Rusisë, duke theksuar se e ardhmja e luftës qëndron në teknologjinë e përparuar.
“Mund të themi me besim se HUR dhe Grupi 13 i Ukrainës e kanë shtyrë Flotën Ruse të Detit të Zi përsëri në portet e tyre. Ata janë të kufizuar në lëvizjet e tyre dhe nuk i përmbushin më misionet e tyre të caktuara”, tha komandanti i njësisë, i njohur me nofkën “Trembëdhjetë”.
