Kina po zgjeron programet pilot për të hapur më tej sektorin e saj të shërbimeve ndaj investimeve të huaja, duke nxitur kështu qëndrueshmërinë ekonomike për të kundërshtuar “unilateralizmin dhe proteksionizmin global në rritje”, thanë zyrtarët e Këshillit të Shtetit të Kinës në një konferencë shtypi të hënën.
Sipas tyre, Kina ka miratuar 11 provinca dhe qytete për provat e liberalizimit të sektorit të shërbimeve që nga viti 2015. Këto provinca e qytete kanë lehtësuar hyrjen në treg dhe kanë zgjeruar hapjen institucionale sa u përket rregullave, standardeve dhe menaxhimit. Tani, nëntë qytete të tjera, si Dalian dhe Ningbo, do t’i bashkohen nismës.
Plani i qeverisë përmban 155 detyra pilot lidhur me telekomunikacionin, financat, shëndetësinë, kulturën dhe turizmin. Ai përfshin heqjen e kufirit maksimal të aksioneve në pronësi të huaj të lejuara lidhur me dyqanet e aplikacioneve në celular, si edhe lejimin e mjekëve të huaj që të krijojnë klinika, dhe të agjencive të udhëtimit me investim të huaj që të operojnë në Kinë shërbimet e turizmit jashtë vendit.
Në sektorin financiar, Kina do të rrisë mbështetjen për investimet dhe financimin ndërkufitar të kompanive shumëkombëshe, duke shfrytëzuar sistemin e unifikuar të llogarive bankare në monedhën kineze renminbi e valutë të huaj, për të thjeshtuar marrëveshjet e tregtisë dhe të investimeve, bëri të ditur Wang Xin, drejtori i Zyrës Kërkimore të Bankës Popullore të Kinës.
Sektori i shërbimeve mbetet “magneti” kryesor i Kinës për thithjen e investimeve të huaja, duke zënë mbi 70 për qind të vëllimit të përgjithshëm të kapitalit hyrës në tremujorin e parë të 2025-s, sipas të dhënave të Ministrisë së Tregtisë të raportuara nga gazeta “Securities Times”.
Kina hoqi të gjitha kufizimet ndaj investimeve të huaja në sektorin e prodhimit në vitin 2024 dhe po ul në mënyrë progresive pengesat e hyrjes në treg për sektorin e shërbimeve.
