Rënia e Bitcoin (BTC) në fillim të shtatorit sjell një kujtesë jo të këndshme për tregtarët: historikisht, ky muaj nuk ka qenë në favorin e tyre.0
Sipas të dhënave të CoinDesk, BTC ka shënuar humbje në 9 nga 14 shtatorët e fundit, me një rënie mesatare prej rreth 12 për qind.
Ky trend negativ duket se po përsëritet edhe në vitin 2025. Bitcoin e nisi javën pranë nivelit prej 110 mijë dollarësh – më i ulëti në gati dy muaj – ndërsa kapitalizimi total i tregut të kriptovalutave ra në 3.74 trilionë dollarë, niveli më i ulët në tre javët e fundit.
Gjatë 24 orëve të fundit, çmimi i BTC mbeti i pandryshuar. Ndërkohë, disa altcoin shënuan rritje modeste: Solana (SOL) u rrit me 4 për qind, XRP me 1 për qind, dhe Cardano (ADA) me 1.5 për qind.
Tregtarët janë të shqetësuar për kombinimin e pasigurisë makroekonomike, ndjesisë së brishtë në treg dhe vëllimeve të ulëta të tregtimit – faktorë që e bëjnë shtatorin edhe më sfidues. Analisti i FxPro, Alex Kuptsikevich, thekson se treguesit teknikë sugjerojnë një trend negativ, me grafikun e kapitalizimit që tregon ulje të vazhdueshme. Ai paralajmëron se nëse BTC nuk arrin të mbajë nivelin e 112 mijë dollarëve, mund të bjerë drejt zonës së mbështetjes 105 mijë dollarëve, përpara kufirit psikologjik prej 100 mijë dollarëve.
Indeksi i frikës për kriptovalutat ka rënë në 40 – më i ulëti që nga prilli – një shenjë që tregu është nën presion dhe paniku mund të jetë afër, raporton coindesk.
E kaluara gjithashtu nuk ofron shumë shpresë. Në vitin 2017, BTC ra me 8 për qind në shtator; në 2019, humbi pothuajse 14 për qind; dhe në 2021 e 2022 pati gjithashtu rënie të ndjeshme. Këto rënie shpesh lidhen me shterimin e likuiditetit dhe ndryshimet makroekonomike pas verës.
Këtë vit, presioni reflektohet edhe në flukset e ETF-ve. Pas një periudhe akumulimi gjatë gushtit, javën e kaluar ETF-të spot të bitcoin në SHBA panë dalje neto prej 440 milionë dollarësh. Ndërkohë, ETF-të e eterit shënuan mbi 1 miliard dollarë në hyrje – një pikë e ndritshme që sugjeron më shumë riorientim të kapitalit sesa rritje të përgjithshme.
Sipas CryptoQuant, ETF-të spot zotërojnë tashmë mbi 1.3 milionë BTC – afërsisht 6 për qind e furnizimit total – duke u renditur për nga pesha në treg përkrah bursave më të mëdha.
Në horizontin makro, investitorët presin të dhënat për pagat jo-bujqësore në SHBA, të cilat pritet të tregojnë një ngadalësim në krijimin e vendeve të punës. Një raport më i dobët mund të nxisë pritjet për ulje të normave të interesit nga Fed në shtator – një zhvillim që potencialisht mund të rigjallërojë optimizmin në treg.
Megjithatë, deri atëherë, tregtarët po mbrohen nga rreziku. Të dhënat e tregut të opsioneve tregojnë një rritje të ndjeshme të kërkesës për opsione “put”, një sinjal i qartë se investitorët janë të pozicionuar për skenarë rënës. Kuptsikevich thekson nevojën për kujdes të shtuar, veçanërisht për tregtarët afatshkurtër.
