Shkup, 12 nëntor, argument.mk/ – Ministri i Ekonomisë dhe Punës, Besar Durmishi, bashkë me deputeten Kaltrina Beqiri dhe zv/kryetarin e Tetovës Albi Qamili, kanë vizituar kompaninë “Kiel Maqedoni” në Tetovë, ku ka theksuar rëndësinë e investimeve të huaja në zhvillimin ekonomik të vendit, modernizimin e industrisë dhe krijimin e vendeve të reja të punës.
Gjatë vizitës, ministri Durmishi u njoh nga afër me kapacitetet prodhuese të kompanisë, e cila ka realizuar investime prej mbi 11 milionë eurosh në objektin ekzistues në ZZHTI Tetovë, ndërsa ka vendosur edhe një linjë të re të automatizuar të lyerjes me pluhur, investim ky në vlerë prej rreth 1,5 milionë eurosh.
Durmishi theksoi se “Kiel Maqedoni” është shembull konkret i një investimi të huaj që jo vetëm ka arritur të zhvillohet me sukses, por vazhdon të zgjerojë kapacitetet dhe të krijojë perspektivë për punësime të reja.
“Për ne si Ministri e Ekonomisë dhe Punës, pikërisht ky është thelbi i investimeve – kapacitete të reja prodhuese, vende të qëndrueshme pune, mundësi për zhvillim profesional të punëtorëve dhe vlerë e shtuar më e lartë në ekonomi”, theksoi ministri Durmishi.
Kompania, e cila ka filluar veprimtarinë në vitin 2017, aktualisht numëron rreth 190 të punësuar në dy objektet e saj prodhuese në Tetovë dhe Zhelinë. Me zgjerimin e kapaciteteve dhe funksionalizimin e linjës së re, ku tashmë janë angazhuar pesë punëtorë, pritet të krijohen mundësi për punësime shtesë.
Ministri Durmishi vlerësoi veçanërisht faktin që produktet e prodhuara në Maqedoninë e Veriut janë pjesë e zinxhirëve ndërkombëtarë të prodhimit të kompanive të njohura si “Siemens”, “Alstom” dhe “Stadler”, duke dëshmuar potencialin e fuqisë punëtore vendore dhe konkurrueshmërinë e industrisë së vendit.
Ai nënvizoi se prioritet i Ministrisë së Ekonomisë dhe Punës mbetet krijimi i një klime të favorshme për investime, zgjerimi i kapaciteteve prodhuese dhe sigurimi i vendeve të qëndrueshme të punës, me mundësi për avancim profesional dhe të ardhura më të mira për qytetarët.
“Angazhimi ynë është të krijojmë kushte në të cilat kompanitë do të kenë interes të investojnë, të zgjerojnë prodhimin dhe të hapin vende të reja pune, ndërsa punëtorët do të kenë mundësinë e punësimit të sigurt, avancimit të shkathtësive të tyre dhe të ardhurave më të mira”, deklaroi Durmishi.
Në fund të vizitës, ministri përgëzoi drejtuesit dhe të punësuarit e kompanisë për rezultatet e arritura, duke theksuar se investimet që sjellin teknologji moderne, rritje të prodhimit dhe vende të reja pune janë thelbësore për zhvillimin ekonomik të vendit.
