Shkup, 12 nëntor, argument.mk/ – Banka Popullore vazhdon me lehtësimin gradual të kushteve për klientët e Bankës ALTA, në mes të krizës në të cilën është përfshirë banka serbe. Me ndryshimin më të fundit të aktvendimit për administrim të përkohshëm, mundësohet pagesa e pagave, së bashku me pagesën e tatimeve dhe kontributeve përkatëse, për kompanitë që gjatë tre muajve të fundit kanë kryer rregullisht pagesën e pagave përmes llogarive të pagesave në bankë.
“Kjo mundësi u referohet kompanive për të cilat pagesa e pagave përmes Bankës ALTA ShA Manastir paraqet një praktikë të vendosur, përkatësisht kompanive që e kanë shfrytëzuar vazhdimisht bankën për këtë qëllim edhe gjatë tre muajve para miratimit të vendimit. Gjithashtu, shuma e mjeteve që mund të përdoren nga llogaria e pagesave e kompanisë në Bankën ALTA për pagesën e pagave mund të jetë deri në 5% më e lartë në krahasim me shumën e përgjithshme të pagave të paguara në muajin tetor.”, thanë nga Banka Popullore.
Banka Popullore thotë se po e ndjek me kujdes situatën e krijuar dhe do të vazhdojë me masa adekuate edhe në periudhën në vazhdim.
“Banka Popullore e ndjek me kujdes gjendjen në Bankën ALTA ShA Manastir dhe vazhdon t’i përshtatë masat, duke i marrë parasysh kushtet e punës së Bankës dhe nevojat e klientëve të saj. Me këtë rast, prioritet mbeten mbrojtja e interesave të klientëve dhe lehtësimi gradual i kufizimeve, duke ruajtur kontrollin përkatës mbi daljet e mjeteve.”, thanë nga Banka Popullore.
Ndërkohë po hapen sportele të reja për t’u shërbyer klientëve. Pas Tetovës dhe Strumicës, sportele janë hapur edhe në lagjen Aerodrom të Shkupit. Nga 10 nëntori, klientët po përdorin shërbime bankare elektronike dhe mobile, sipas limitit prej 15.000 denarë në javë për klientët që posedojnë kartela pagesore, dhe deri në 20.000 denarë për dy javë për ata që nuk posedojnë.
