Bashkimi Evropian i kërkon sqarim Serbisë për pasivizimin e adresave të shqiptarëve në Luginën e Preshevës.
Ditë më parë, Gjykata Kushtetuese e Serbisë refuzoi ankesën e një qytetari nga Medvegja për kthimin e adresës së banimit, por zëdhënësja e Komisionit Evropian, Pisonero, tha se institucionet në Bruksel kanë parasysh shqetësimet e komunitetit shqiptar në Serbi lidhur me këtë problem. Pisonero ka thënë se kjo çështje është trajtuar edhe në raportin e progresit për Serbinë që u publikua muajin e kaluar.
“E kemi bërë të qartë se ka nevojë që autoritetet serbe t’i shpjegojnë më mirë publikut se si po kryhen kontrollet e statusit të qëndrimit, duke rezultuar në pasivizimin e adresave të caktuara dhe nëse Serbia e Jugut është në shënjestër të veçantë në këtë drejtim”, ka deklaruar Ana Pisonero.
