Një tunel i fshehtë mes SHBA-së dhe Meksikës do të mbyllet pasi u zbulua në fillim të këtij muaji.
Doganat dhe Mbrojtja Kufitare e SHBA-së (CBP) tha se agjentët e saj gjetën një tunel të kompletuar të krijuar nga njeriu pasi inspektuan një sistem kullimi në Teksas, shkruajnë mediat e huaja, përcjell Telegrafi.
Sipas zyrtarëve, tuneli kalon midis qytetit meksikan të Ciudad Juarez dhe qytetit amerikan të El Pasos, të cilat ndahen nga Rio Grande dhe kufiri SHBA-Meksikë.
Gjenerali Jose Lemus, komandanti i garnizonit ushtarak të Ciudad Juarez, tha të dielën se zyrtarët meksikanë do të mbyllnin nënkalimin rreth 300 metra të gjatë, sipas CBS News.
Ai shtoi se tuneli – i zbuluar për herë të parë në 10 janar – “duhet të ketë marrë shumë kohë” për t’u ndërtuar, duke sugjeruar se “mund të ketë qenë një ose dy vjet”.
Kjo vjen pasi SHBA dhe Meksika forcojnë sigurinë kufitare përpara inaugurimit të Donald Trump të hënën.
Presidenti i zgjedhur premtoi dëbime masive gjatë gjithë fushatës zgjedhore dhe tha se do të fillonin “shumë herët, shumë shpejt” pasi ai të bëjë betimin si president.
NBC News gjithashtu raportoi se zyrtarët e Emigracionit dhe Zbatimit të Doganave po planifikojnë disa aksione në Çikago, Illinois, pas inaugurimit të zotit Trump.
