Personi i armatosur që vrau 10 persona nga të shtënat masive në Suedi duket se ka qëlluar veten, ka thënë policia.
Sulmi në një qendër arsimore për të rritur të martën u përshkrua nga kryeministri i vendit, si të shtënat masive më të këqija në historinë e Suedisë.
Në një përditësim të mërkurën, policia tha se autori duket se ka qëlluar veten dhe shtoi se ata janë ende të paqartë mbi motivin, transmeton Telegrafi.
Kreu i policisë lokale, Roberto Eid Forest, tha se ambientet e mëdha të shkollës nënkuptonin se u desh një kohë e gjatë që oficerët të kontrollonin kampusin dhe të siguroheshin se nuk kishte më viktima.
Policia dëgjoi të shtëna armësh kur mbërritën dhe fillimisht menduan se po qëlloheshin, shtoi ai.
Të shtënat filluan rreth mesditës sipas kohës lokale në kampusin Risbergska në qytetin e Orebro, rreth 200 kilometra në perëndim të kryeqytetit, Stokholm.
Sulmi ndodhi pasi shumë nxënës kishin shkuar në shtëpi pas një provimi kombëtar. E pjesa tjetër ishte strehuar në ndërtesat aty pranë dhe pjesë të tjera të kampusit u evakuuan.
Zyrtarët thanë se tre gra dhe dy burra, të gjithë me plagë me armë zjarri, iu nënshtruan një operacioni në spital.
Të gjithë ishin në gjendje të rëndë, por situata ndryshoi pas intervenimit të mjekëve. Një tjetër grua u trajtua për lëndime të lehta.
Të gjitha viktimat ishin mbi 18 vjeç, thanë zyrtarët. Policia tha më parë se numri i të vrarëve mund të rritet.
Ata thanë se nuk ka pasur paralajmërime paraprake dhe besojnë se autori ka vepruar i vetëm. Nuk treguan nëse burri ishte nxënës në shkollë.
