Arabia Saudite bëri thirrje sot, për heqjen e sanksioneve të vendosura ndaj Sirisë, në përfundim të konferencës së Riadit, ku morën pjesë ministrat e jashtëm, të vendeve evropiane dhe të Lindjes së Mesme.
Vendet perëndimore, megjithatë, këmbëngulin të kërkojnë garanci nga autoritetet e reja siriane, si kusht për heqjen e sanksioneve.
Ministri i Jashtëm saudit, Princi Faisal bin Farhan bëri thirrje për heqjen e sanksioneve të njëanshme dhe ndërkombëtare në mënyrë që të zhvillohet dhe rindërtohet Siria.
Sot në Riad u organizuan dy konferenca, një mes vendeve arabe dhe një tjetër me pjesëmarrjen e përfaqësuesve të vendeve perëndimore, OKB-së, BE-së dhe Turqisë.
Qeveria siriane u përfaqësua nga ministri i ri i jashtëm, Assad al-Shibani.
SHBA, BE dhe vende të tjera perëndimore kanë vendosur sanksione ndaj qeverisë së Bashar al-Asad që nga viti 2011. Shumë vende, përfshirë SHBA-në, kanë thënë se do të gjykojnë autoritetet e reja siriane me veprimet e tyre, pasi qeveria dominohet nga grupi radikal islamik Hayat Tahrir al- Sham (HTS), ish-dega e al-Kaedës në Siri.
“Sanksionet kundër bashkëpunëtorëve të Bashar al-Assad, të cilët janë përgjegjës për krime të rënda gjatë luftës civile, mund të mbeten”, Por populli sirian duhet të përfitojë nga efektet pozitive të tranzicionit” tha Ministrja e Jashtme gjermane, Analena Burbock. .
Kreu i diplomacisë evropiane Kaya Kalas, deklaroi sot se nëse bëhet “progres i prekshëm”, kryesisht në lidhje me mbrojtjen e minoriteteve, ministrat e jashtëm të BE-së do të diskutojnë këtë çështje më 27 janar.
“Duhet të bëhet gradualisht dhe me kusht. Për sa kohë që shohim progres në drejtimin e duhur, ne jemi gati të kalojmë në hapat e ardhshëm. Por duhet të ketë gjithashtu një plan rikthimi”, shtoi Kalas.
Njoftimi i kryesisë së dy seancave, i publikuar mbrëmjen e sotme nga mediat saudite, nuk përfshinte asnjë thirrje nga të gjithë pjesëmarrësit për lehtësimin e sanksioneve. Aty thuhet vetëm se u diskutuan masat, për të mbështetur popullin sirian si ofrimin e ndihmës dhe mbështetjen e nevojshme për Damaskun.
Arabia Saudite ndërpreu marrëdhëniet me regjimin e Asadit në vitin 2012, por i rivendosi ato në vitin 2023 dhe punoi për kthimin e Sirisë në Ligën Arabe. Ministri i Jashtëm saudit nënvizoi sot rëndësinë e vazhdimit të ndihmës humanitare dhe ekonomike për Sirinë, si dhe forcimin e aftësive të shtetit sirian, për të garantuar stabilitetin dhe për të lehtësuar rindërtimin. Syri.net- Kahtimerini
