Presidenti rus, Vladimir Putin ka arritur në Mongoli, duke shënuar vizitën e parë në një vend që është anëtar i Gjykatës Ndërkombëtare Penale (ICC) që kur ajo lëshoi një urdhër arresti për të vitin e kaluar.
Mediat shfaqen pamjet e aeroplanit të diktatorit rus duke aterruar në kryeqytetin mongol, Ulaanbaatar.
Putini kërkohet nga ICC-ja për deportimin e paligjshëm të fëmijëve ukrainas nga zonat e Ukrainës të pushtuara nga forcat ruse, shkruan moscowtimes.
ICC lëshoi urdhrin e arrestit për Putinin në muajin mars të vitit 2023, duke përmendur “fakte të besueshme” se ai është përgjegjës për dëbimin e paligjshëm të fëmijëve ukrainas në Rusi.
Kievi pretendon se mijëra fëmijë u dëbuan me forcë nga jetimoret dhe institucionet e tjera shtetërore pasi Rusia nisi pushtimin në shkallë të plotë në shkurt të vitit 2022.
Moska pohon se i zhvendosi fëmijët për sigurinë e tyre dhe e ka hedhur poshtë urdhrin e ICC-së si të parëndësishëm. Megjithatë, udhëtimi i kësaj jave në Mongoli është i pari i Putinit në një shtet anëtar të ICC që nga lëshimi i urdhrit 18 muaj më parë.
Pas arritjes së Putinit, Amnesty International paralajmëroi se dështimi i Mongolisë për ta arrestuar atë mund ta inkurajojë më tej liderin rus.
“Çdo udhëtim në një shtet anëtar të ICC-së që nuk përfundon me arrestim do të inkurajojë kursin aktual të veprimit të presidentit Putin dhe duhet parë si pjesë e një përpjekjeje strategjike për të minuar punën e ICC-së”, shtoi ajo.
